أهلي موسيماني.. مشروع ليفربول يحتاج لسنوات من العمل الجاد

هل وجود أمر سلبي لدى مدرب يعني أنه وحش أو أن تجربته وحشة؟ هل بردوا الظهور بشكل سئ في شوط أو ماتش حتى يعني أنه وحش؟ دي عينة أسئلة ممكن توجه أو بتوجه فعلاً لموسيماني خاصة في الماتشات الاخيرة وبعض الجماهير بتقول أنه مدرب بلا بصمة، وعموما دا خلط جماهيري بيتنسي بمجرد تحقيق الفوز في الغالب أو بييجي نتيجة أن الجماهير دي بتبص للأمور بشكلها العام ومش بتاخد بالها من التأثير الفني.

كأي شخص عندي ملاحظات على شكل الأهلي في بعض المباريات واداء اللاعبين فيها، زي مثلا أن في ماتش المحلة والاتحاد رغم أن الأهلي تقريبا لعب بنفس الشكل الفني إلا أنه كان رائع وأشدت بيها لكن لعب بنفس الشكل قدام مثلا سيراميكا وانتقدته رغم انها نفس الشكل الفني والقصد هنا أن الخلاف على شكل في بعض المباريات مش على قيمة المدرب فنيا نروح بقى نبص لشكل الأهلي وتأثير موسيماني على الفريق.

لموسيماني فعلًا تأثير إيجابي كبير على طريقة لعب الاهلي حتى لو كان هو ككوتش مش أفضل من فايلر في فترته الأولى لكن في نفس الوقت هو في مستوى قريب وكمان عنده مميزات أكيد زي ما فيه بعض السلبيات، بنظرة فنية سريعة كدا على شكل الأهلي مع موسيماني.

1-الأهلي تحول مع موسيماني لماكينة ضغط في كل مكان في الملعب أقرب مثال (ليفربول النموذج الأمثل في العالم)، بيضغط من فوق وفي كل شبر في الملعب ومساحات قريبة ودا بيخليه يستعيد الكرة بسرعة كبيرة، وهتلاقي أعلى نسبة استخلاص للكرة في الأهلي، المشكلة الوحيدة اللي بتأثر هنا في حاجتين (جناح كسول أو صانع لعب كسول) في ماتش الانتاج الحربي كانت المشكلة إن دور قفشة وكهربا وحسين الشحات أنهم يضغطوا على الظهيرين بيحث يحرموا الانتاج من الكرات العرضية اللي هي من الألعاب الأساسية للانتاج لكن لما دا محصلش ظهر مساحات كبيرة والضغط تحول على وسط الملعب اللي (قفشة بدوره معملش دوره) فضغط حمدي وديانج وبالتالي ومع تراجع مستوى معلول الشوط الأول ظهرت مشاكل في الاهلي.

المشاكل دي هي مشاكل ماتش مباراة واتحلت الشوط التاني لكن مينفعش أبدا انتقادي لمدرب في ماتش يخليني مخدش بالي من اللي بيعمل في الفريق.

2-من مكاسب الأهلي الفنية مثلا القدرة العالية جدًا على تبادل المراكز بين الأجنحة دون تأثر للفريق في نص الشوط الأول راح حسين مكان كهربا وراح كهربا مكان حسين من غير ما تشعر بهذا التغيير، أضف لذلك إن إزاي بيتحرك التلاته الجناحين وصانع الألعاب في المساحة بين خط الدفاع ونص الملعب للخصم ودي من أخطر مناطق الدفاع مع فتح المساحة للجناحين فتلاقي نفسك في زيادة هجومية من 5 أو 6 لاعبين في من\قة الجزاء.

3-في الجول الأول للأهلي ماتش الإنتاج استلم حسين الكرة من جوه الملعب وقرب منه بواليا وفي نفس الوقت كان قفشة داخل على منقطة الجزاء وعلي معلول على حدود منطقة الجزاء إيه حصل

مشي حسين عمل وان لبواليا اللي عمل تشيب التوا حسين استلمها لما طولت منه كان اللي في منطقة الجزاء مين؟ علي معلول

دا مش جول ارتجال لكنه جول مبني على تحرك خطط بيتكرر في ماتشات كتير وانا هنا بضرب مثل بماتش الإنتاج لانه الأقرب فالناس فاكرة شوية.

4-تنويع اللعب الهجومي، أبرز مثال كره لعبها كهربا من فوق المدافعين لبواليا اللي اتحرك حلو قوي وقف حلو قوي وحطها فوق العارضة والكرة دي تحديدًا لشقين أساسيين الأول هي بيان قيمة التحرك التكتكي والجمل اللي اللاعيبة بتدرب عليها وثانيا هي إن (بواليا) اللي لسه داخل الفريق من كام يوم وفي وقت قليل جزء من المنظومة فلو شلته ودخل غيره هيبقى زيه وهكذا هيفضل سيستم اللعب مع اختلاف الأسماء ودي بصمة فنية.

5-تنوع الحلول في صناعة اللعب مع موسيماني مثلا قد يكون محمد الشناوي هو صانع الألعاب أه والله عادي بيطلع خطوات وبيلعب الطولية ممتاز جدا ومنها أوقات بتحصل خطورة، بدر بانون بيبني الهجمة وأيمن اشرف كمان فهنا عندك 3 محطات لصناعة اللعب ولكل منهم دور في وقت ما وفاعلية ما (النقطة السلبية هنا إن لو جربنا بديل للثنائي هل فعلا هيكون بنفس الفاعلية الهجومية) رأيي باستثناء احمد رمضان بيكهام مفيش حد يقدر يقوم بالدور دا ودي مشكلة متمناش موسيماني يقابلها.

6- لو حضرتك مسكت الاستوب ووتش وحسبت الأهلي بيأخد وقت قد إيه لاستعادة الكرة من الخصوم هتعرف إن أقل نسبه غالبا في الدوري بالكامل، في جول حسين الشحات موقف فني مركب إزاي الأول الأهلي فقد الكرة وفي لحظات ضغط 3 لاعيبة أخدوا الكرة دا أول ملمح فني والتاني إن لما الظهير الأيمن أكرم فتح ناحية ناحية اليمين حسين دخل حدود منطقة الجزاء فلما أكرم رجع الكره له كان تقريبا في موضع واحد ضد واحد في قلب منطقة الجزاء ودا ملمح فني.

السلبيات هنا أوقات أن مش دايما اللاعيبة بتكون في حالتها وقادرة على تطبيق الطريقة دي وساعات مش فايقين ودي سلبية لاعب الناس بتفتكر المدرب في ماتش الانتاج كان تمركز حسين وقفشة وحمدي مش تمام فحصل ان نص الملعب فضي والكرة التانية من بتاعته ودا مش خطأ فني قد ما هو خطأ لاعبين اتصلح الشوط التاني..

السلبيات إن أوقات بعض الفرق زي ماتش سيراميكا مينفعش تلاعبهم بـنفس الطريقة 3 دفيندر لانهم أصلا بيدافعوا، الأزمة التانية إن لو غاب بعض المحركات الأساسية للطريقة بنتأثر لكن أظن دي كلها مشاكل صعب حلها فمبدئيات لازم الناس تعرف غن فيه حاجة اسمها مشاكل فنية في ماتش وبين إن مفيش سيستم لعب مينفعش نخلط.